ஹிந்தியை நீக்க கோரிக்கை விடுத்த நிலையில் பள்ளி வருகைப் பதிவு கருவியில் 9 மொழிகள் திடீர் சேர்ப்பு: தமிழுடன் மராத்தி, குஜராத்தி, பஞ்சாபி இடம் பெறச் செய்து புதிய நெருக்கடி. 08,ஆடி,தமிழ்தொடர்ஆண்டு-5121: தமிழகத்தில் உள்ள அரசு உயர்நிலை, மேல்நிலைப்பள்ளிகளில் ஆசிரியர் வருகையை பதிவு செய்யும் கருவியில் தமிழ் சேர்க்கப்பட்டு, ஹிந்தி உட்பட 9 மாநில மொழிகளும் சேர்க்கப்பட்டு புதிய நெருக்கடியை ஏற்படுத்தியுள்ளது. தமிழகத்தில் 3,688 அரசு உயர்நிலைப்பள்ளிகள், 4,040 மேல்நிலைப்பள்ளிகளில் வருகை பதிவேடு முதல்கட்டமாக அமல்படுத்தப்பட்டுள்ளது. இதில் ஆசிரியர்கள், ஆசிரியரல்லாத பணியாளர்கள் தங்கள் வருகையை பதிவு செய்து வருகின்றனர். இந்த நடைமுறை கடந்த மாதம் முதல் செயல்பட்டு வருகிறது. இந்நிலையில், வருகை பதிவு கருவியில் தமிழுக்கு பதில் ஹிந்தி மொழி சேர்க்கப்பட்டுள்ளது என்று செய்தி வெளியானது. இது ஆசிரியர்கள் மற்றும் தமிழ் ஆர்வலர்கள் நடுவே கடும் அதிர்ச்சியை ஏற்படுத்தியது. இதையடுத்து, தற்போது, வருகைப்பதிவு கருவியில் தமிழ் மொழி உட்பட 9 மொழிகள் சேர்க்கப்பட்டுள்ளன. இதுகுறித்து பள்ளி கல்வித்துறை அதிகாரிகள் கூறுகையில், ‘ஆசிரியர்களின் வருகைப்பதிவுக் கருவியில் ஆசிரியர்களின் விவரங்களை ஆதார் அடிப்படையில் ஆங்கிலத்தில் பதிவேற்றம் செய்யப்பட்டது. கடந்த கிழமையில் ஆங்கிலம், ஹிந்தி மொழிகள் சேர்க்கப்பட்டிருந்தன. தற்போது, கருவியில் மாற்றம் செய்யப்பட்டு மாநில மொழிகளும் இணைக்கப்பட்டுள்ளன. அதில் தமிழ், தெலுங்கு, ஆங்கிலம், ஹிந்தி, மராத்தி, குஜராத்தி, பஞ்சாபி, மலையாளம், பெங்காலி ஆகிய மொழிகள் இணைக்கப்பட்டுள்ளன. மேலும், பதிவுக் கருவியின் முகப்பதிவில் மொழி தேர்வு செய்வதற்கான புதிதாக பித்தான் இணைக்கப்பட்டுள்ளது. அதில் 9 மொழிகள் சேர்க்கப்பட்டுள்ளதால், எந்த மொழியை வேண்டுமானாலும் ஆசிரியர்கள் பயன்படுத்தும் வகையில் மாற்றம் கொண்டு வரப்பட்டுள்ளது’ என்றனர். ஹிந்தி புகுத்தப்பட்டதை எதிர்த்து குரல் கொடுத்த நிலையில், அதை நீக்கிவிட்டு தமிழை மட்டும் சேர்க்க நடவடிக்கை எடுக்காமல், தமிழுடன் மொத்தம் 9 மொழிகளை பதிவுக் கருவியில் சேர்த்திருப்பது ஆசிரியர்களிடையே அதிர்ச்சியை ஏற்படுத்தியுள்ளது. தமிழக பள்ளிகளில் உள்ள வருகைப் பதிவு கருவிகளில் தமிழும், ஆங்கிலமும் இடம் பெற்றிருந்தால் போதுமே. தமிழை நீக்கிவிட்டு ஹிந்தியை புகுத்தியதை கண்டித்தால், வேறு மொழிகளையும் சேர்த்து புதிய நெருக்கடியை உருவாக்கியுள்ளது. -தமிழர்க்குத் தொடர்ஆண்டு மட்டுமல்ல, தொடர் நாள் கணக்கும் உண்டு. இன்று தமிழ்த் தொடர்நாள் எண்:18,70,223.
மௌவலின் தினசரி செய்திகளை உடனுக்குடன் பெற, Facebook, Twitter மற்றும் Google Plus போன்ற சமூக வலைதள பக்கங்களில் பின்தொடருங்கள்.
