12,தை,தமிழ்தொடர்ஆண்டு-5120: ஸ்டெர்லைட் ஆலையை திறக்க உத்தரவிட இருந்த நிலையில் உச்ச அறங்கூற்றுமன்ற அறங்கூற்றுவர்கள் முடிவை மாற்றி செவ்வாய்க்கிழமைக்கு வாதத்தைத் தொடரவைக்கும் முடிவை எடுக்க வைத்தார் வைகோ. இதை அங்கிருந்த வழக்கறிஞர்கள் பாராட்டினர்.

நேற்று முற்பகல் 12 மணி அளவில் வழக்கை விசாரணைக்கு எடுத்தபோது, தமிழ்நாடு மாசு கட்டுப்பாட்டு வாரியத்தின் வழக்கை ஏற்க முடியாது என்றும், ஸ்டெர்லைட் ஆலையைத் திறக்க இன்றே ஆணை பிறப்பிக்கப் போகிறோம் என்றும், ஒருமுறைக்கு நான்கு முறை அறங்கூற்றுவர் நாரிமன் அழுத்தமாகச் சொன்னார்.

வைகோ, தன் தரப்பு வாதத்தை முன்வைக்க எழுந்தபோது, 'உணவு இடைவேளைக்குப் பிறகு உங்களுக்கு வாய்ப்புத் தருகிறேன்' என்று அறங்கூற்றுவர் நாரிமன் கூறினார்.

தமிழ்நாடு அரசுத் தரப்பு வழக்கறிஞர் வாதத்தை அறங்கூற்றுவர் ஏற்கவில்லை. அதன்பின், வைகோ வாதத்தை முன்வைத்தார்.

'ஸ்டெர்லைட் ஆலையைத் திறக்க உத்தரவு பிறப்பிக்கப் போகிறோம்' என இன்று காலையில் நீங்கள் அறிவித்த அறிவிப்பு, பேரிடியாகத் தலையில் விழுந்தது. தாங்க முடியாத அதிர்ச்சிக்கு ஆளானேன். இந்த ஸ்டெர்லைட் ஆலை, மராட்டிய மாநிலம் ரத்தினகிரியில் திறக்கப்பட்டபோது, உழவர்கள் உடைத்து நொறுக்கினார்கள். மராட்டிய அரசு, உரிமத்தை செய்தது.

அறங்கூற்றுவர்: அதை ஏன் இப்போது குறிப்பிடுகின்றீர்கள்?

வைகோ: அப்போது ஸ்டெர்லைட் நிறுவனம் ஏன் மும்பை உயர் அறங்கூற்று மன்றத்திலோ, உச்ச அறங்கூற்று மன்றத்திலோ மேல் முறையீடு செய்யவில்லை? மற்ற மாநிலங்கள் உள்ளே நுழைய விடாததால், துத்துக்குடிக்கு வந்து எங்கள் தலையில் எமனாக அமர்ந்தது. 22 ஆண்டுகளாக அதனை எதிர்த்துப் போராடி வருகின்றேன். என்னுடைய ரிட் மனு மீதுதான், சென்னை உயர் அறங்கூற்றுமன்றம் ஸ்டெர்லைட்டை மூட உத்தரவு பிறப்பித்தது. அதற்கு உச்ச அறங்கூற்றுமன்றம் இடைக்காலத் தடை வழங்கியது. அதனால், ஆலை இயங்கியது.

அறங்கூற்றுவர்: பழைய சம்பவங்களை இப்போது ஏன் சொல்கின்றீர்கள்?

வைகோ: அரசியலுக்காக நான் பேசவில்லை. பத்து லட்சம் மக்களின் குரலாகப் பேசுகின்றேன். மீனவர்கள், உழவர்கள், வணிகர்கள், மாணவர்கள், பொதுமக்கள் சார்பாகப் பேசுகின்றேன். 

10,பங்குனி,தமிழ்தொடர்ஆண்டு-5114 (23.03.2013) காலையில், ஸ்டெர்லைட் நச்சுப் புகையால் மக்கள் மயங்கி விழுந்தனர். ஸ்டெர்லைட் ஆலை மூடப்பட்டது. அதனை எதிர்த்து, பசுமைத் தீர்ப்பாயத்தை ஸ்டெர்லைட் ஆலை நாடியது.

நீதிபதி: தமிழ்தொடர்ஆண்டு-5114க்கும் இதற்கும் என்ன சம்பந்தம்?

வைகோ: பசுமைத் தீர்ப்பாயம் ஸ்டெர்லைட் ஆலைக்கு ஆதரவாக வழங்கிய தீர்ப்பை எதிர்த்து, உச்ச அறங்கூற்று மன்றத்தில் நான் பதிகை செய்த மேல் முறையீட்டு மனுக்கள் எண் 9542, எண் 9543 உச்ச அறங்கூற்று மன்றத்தில் நிலுவையில் உள்ளன. அந்த  மேல் முறையீட்டையும், தற்போது இந்த அறங்கூற்று மன்றத்தில் நடக்கும் வழக்குடன் சேர்த்து நடத்த வேண்டும்.

அறங்கூற்றுவர்: அதைக் கவனத்தில் கொள்வோம்.

வைகோ: ஒரு லட்சம் மக்கள் தாங்களாகவே அணி திரண்டு, மாவட்ட ஆட்சியரைச் சந்தித்து கோரிக்கை மனு கொடுக்கப் போனார்கள். அந்த நாள் தமிழ்நாட்டின் கருப்பு நாள் ஆனது. தமிழ்நாடு அரசின் காவல்துறை, ஸ்டெர்லைட் ஆலையின் கூலிப்படையாக மாறி, 13 பேரைச் சுட்டுக்கொன்றது. பள்ளி செல்லும் மாணவி உட்பட, அகவை முதிர்ந்த தாய்மார்கள் வரை சுட்டுக் கொல்லப்பட்டனர்.

மக்கள் உள்ளம் எரிமலையாக வெடித்ததால், தமிழ்நாடு அரசு, கொள்கை முடிவு எடுக்காமல், கண்துடைப்பு நாடகமாக, மாசு கட்டுப்பாட்டு வாரியம், மின்சார வாரியத்தின் மூலம் ஆலையை மூடியது.

முயலோடும் சேர்ந்து ஓடிக்கொண்டே, வேட்டை நாயுடன் சேர்ந்து விரட்டும் வேலைதான் இது.

'நீங்கள் எந்த நீதிமன்றத்திற்கும் செல்லுங்கள். ஆலையைக் கண்டிப்பாகத் திறந்தே தீருவோம்' என்று வேதாந்தா  குழுமத் தலைவர் சொல்கின்றார். எந்த அடிப்படையில் அவர் அவ்வாறு கூறுகிறார்?

அறங்கூற்றுவர்: நீங்கள் பலத்த குரலில் பேசுகின்றீர்கள். சத்தத்தைத் குறையுங்கள்.

வைகோ: அறங்கூற்றுவர் அவர்களே, வருந்துகிறேன். தாங்க முடியாத வேதனையில் பேசினேன். மன்னித்துக் கொள்ளுங்கள்.

அறங்கூற்றுவர்: உங்கள் கோரிக்கைதான் என்ன?

வைகோ: ஆலையைத் திறக்குமாறு இன்று தீர்ப்பு அளிக்க வேண்டாம் எனக் கோருகின்றேன். செவ்வாய்க்கிழமை அமர்வில், எங்கள் தரப்பு வாதங்களை முழுமையாகக் கேளுங்கள். இன்று இந்த வழக்கு விசாரணைக்கு வருகிறது என்று, ஸ்டெர்லைட் தரப்பில் இருந்து எனக்கு எந்தத் தகவலும் கொடுக்கப்படவில்லை. நானாகக் கேள்விப்பட்டுதான் வந்தேன்.

அறங்கூற்றுவர்: உங்களுக்கு முறையாகத் தகவல் அனுப்பப்படும். செவ்வாய்க்கிழமை அமர்வில் உங்கள் வாதங்களை முன்வைக்கலாம்.

வைகோ: எனக்கு 40 நிமிடங்கள் தர வேண்டுகிறேன்.

அறங்கூற்றுவர்: ஆகட்டும்.

இதன்பிறகு, ஆலையைத் திறக்க இன்றே உத்தரவிட வேண்டும் என்று ஸ்டெர்லைட் தரப்பு வழக்கறிஞர் விடுத்த கோரிக்கையை, அறங்கூற்றுவர் ஏற்கவில்லை. செவ்வாய்க்கிழமை அமர்வில் வாதங்களைக் கேட்கிறோம் என்றார்.

அறங்கூற்று மன்றத்தில் இருந்த ஏராளமான மூத்த வழக்கறிஞர்கள், வைகோவின் கரங்களைப் பற்றி, 'இன்று நீங்கள் வென்று விட்டீர்கள். இன்று நீங்கள் இப்படி வாதாடி இருக்காவிடில், ஸ்டெர்லைட் ஆலையைத் திறக்கும் ஆணை இன்றே வந்திருக்கும்' என்றனர்.

நல்லது வைகோ! நீங்கள் தொடர்ந்து போராடி ஸ்டெர்லைட்டுக்கு முடிவு கட்ட வேண்டும் என்று வாழ்த்துகிறோம்.

-தமிழர்க்குத் தொடர்ஆண்டு மட்டுமல்ல தொடர் நாள் கணக்கும் உண்டு. இன்று தமிழ்த் தொடர்நாள் எண்: 18,70,043.

மௌவலின் தினசரி செய்திகளை உடனுக்குடன் பெற, Facebook, Twitter மற்றும் Google Plus போன்ற சமூக வலைதள பக்கங்களில் பின்தொடருங்கள்.